தருணம் படம் எப்படி இருக்கு?

’தருணம்’

இயக்குனர் – அரவிந்த் சீனிவாசன்
நடிகர்கள் – கிஷேன் தாஸ் , ஸ்ம்ருதி வெங்கட் , ராஜ் அய்யப்பன் , கீதா கைலாசம்
இசை – தர்புகா சிவா & அஷ்வின் ஹேமந்த்
தயாரிப்பு – ஜென் ஸ்டுடியோ – புகழ், எடன்

மத்திய ரிசர்வ் போலீஸ் படை அதிகாரியான நாயகனும், நாயகியும் நட்பாக பழக ஆரம்பித்து காதலிக்க தொடங்குகிறார்கள். அவர்களது பெற்றோர்கள் இருவருக்கும் திருமணம் செய்து வைக்க முடிவு செய்கிறார்கள். அதன்படி, சில தினங்களில் இவர்களது நிச்சயதார்த்தம் நடைபெற இருக்கும் நிலையில், நாயகியின் வீட்டுக்குள் நுழையும் ஒருவர் திடீரென்று இறந்து விடுகிறார். அந்த பிரச்சனையில் இருந்து தனது வருங்கால மனைவியை காப்பாற்ற முயற்சிக்கும் நாயகன், யாருக்கும் தெரியாமல் உடலை அப்புறப்படுத்துவதோடு, அவரின் மரணம் தொடர்பாக தங்கள் மீது யாருக்கும் எந்தவித சந்தேகமும் ஏற்படாத ஒரு சூழலை உருவாக்க முடிவு செய்கிறார்.
கண்காணிப்பு கேமரா, காவலாளிகள், ஆள் நடமாட்டம் என பிஸியாகவே இருக்கும் அடுக்குமாடி குடியிருப்பில் இருந்து அந்த உடலை அப்புறப்படுத்தி, கொலை வழக்கில் இருந்து நாயகனும், நாயகியும் தப்பிக்கும் தருணங்களை விறுவிறுப்பாகவும், சுவாரஸ்யமாகவும் சொல்வதே ’தருணம்’.

நாயகன் மற்றும் நாயகியின் அறிமுகம், அவர்களது சந்திப்பு, அவர்களுக்கு இடையே ஏற்படும் நட்பு, காதல் ஆகிய காட்சிகள் முதல் பாதியை வழக்கமான படமாக நகர்த்திச் சென்றாலும், இரண்டாம் பாதியில் கொலை குற்றத்தில் இருந்து தப்பிப்பதற்காக நாயகன் போடும் திட்டமும், அதை செயல்படுத்தும் விதமும் படத்தை வேகமாக பயணிக்க வைப்பதோடு, பார்வையாளர்களை சீட் நுணியில் உட்கார வைத்துவிடுகிறது.

எதிர்பாரத தருணத்தில் நடந்த ஒரு கொலை, அதில் இருந்து தப்பிக்க முயற்சிக்கும் நாயகனின் புத்திசாலித்தனம் ஆகியவற்றை வைத்துக்கொண்டு மிக சுவாரஸ்யமான கிரைம் சஸ்பென்ஸ் திரில்லர் ஜானர் படத்தை கொடுத்திருக்கிறார் இயக்குநர் அரவிந்த் ஸ்ரீநிவாசன். கொலையை மறைப்பதற்காக குற்றவாளிகள் வழக்கமாக மேற்கொள்ளும் நடவடிக்கைகளை ஒதுக்கி வைத்துவிட்டு, இயக்குநர் அரவிந்த் ஸ்ரீநிவாசன் கையாண்டிருக்கும் புதிய யுக்தி படத்தை மற்ற கிரைம் சஸ்பென்ஸ் திரில்லர் படங்களில் இருந்து முற்றிலும் வேறுபடுத்தி காட்டுவதோடு, அந்த யுக்தியை எப்படி செயல்படுத்த முடியும்? என்ற கேள்வியை பார்வையாளர்களிடம் எழுப்பி, அதற்கான விடையை அறிந்துக்கொள்ளும் ஆவலையும் தூண்டிவிட்டு, கதைக்களத்துடன் ஒன்றிவிட செய்கிறார்.

குற்றத்தில் இருந்து எப்படி தப்பிப்பது? என்ற பதற்றத்தையும், பயத்தையும் நேர்த்தியாக வெளிப்படுத்தி நடித்திருக்கும் ஷ்ம்ருதி வெங்கட் மற்றும் தெளிவான திட்டங்கள் மூலம் கொலையை தற்கொலையாக மாற்ற முயற்சிக்கும் கிஷன் தாஸ், இருவரும் தங்களது பணியை சிறப்பாக செய்திருக்கிறார்கள்.

முக்கிய வேடத்தில் நடித்திருக்கும் ராஜ் ஐயப்பா, அவரது அம்மாவாக நடித்திருக்கும் கீதா கைலாசம், நாயகனின் நண்பராக நடித்திருக்கும் பாலசரவணன் ஆகியோர் குறைவான காட்சிகள் வந்தாலும், படம் முழுவதும் நிறைந்திருப்பது போல் திரைக்கதை வடிவமைக்கப்பட்டுள்ளது.

அஸ்வின் ஹேமந்தின் பின்னணி இசை கிரைம் சஸ்பென்ஸ் திரில்லர் ஜானருக்கான உருட்டல், மிரட்டல் சத்தம் இல்லாமல் காட்சிகளின் தன்மைக்கு ஏற்ப பயணித்திருக்கிறது, ஒளிப்பதிவாளர் ராஜா பட்டாச்சார்ஜி, கிரைம் சஸ்பென்ஸ் திரில்லர் ஜானர்களுக்கு பயன்படுத்தப்படும் வழக்கமான வண்ணத்தை தவிர்த்துவிட்டு, காட்சிகளை இயல்பாக படமாக்கியிருக்கிறார்.

கிரைம் சஸ்பென்ஸ் திரில்லர் படங்களுக்கு என்று இருக்கும் வரைமுறையை தவிர்த்துவிட்டு, வித்தியாசமான பாதையில் பயணித்திருக்கும் இயக்குநர் அரவிந்த் ஸ்ரீநிவாசன், முதல் பாதியில் சில இடங்களில் பட்ஜெட் காரணமாக தடுமாறியிருந்தாலும், இரண்டாம் பாதியில் தனது பலமான திரைக்கதை மற்றும் யூகிக்க முடியாத திருப்பங்கள் மூலம் ரசிகர்களை இருக்கையில் கட்டிப்போட்டு விடுகிறார்.

மொத்தத்தில், ‘தருணம்’ ஒரு புதிய திரில்லர் அனுபவம்.

Rating 3/5