’பிரேக்ஃபாஸ்ட்’ (BreakFast) திரைப்பட விமர்சனம்
Casting : Raanav, Rosmin, Sampath Raj, Kasturi, Archana, Krithik Mohan, Amitha Ranganth
Directed By : AR Gandhi Krishna
Music By : G V Prakash Kumar
Produced By : Girija Varadaraj
இன்றைய வேகமான உலகில் காதல் என்பது ஒரு உணர்ச்சி மட்டுமல்ல, ஒரு “அவசர தீர்மானம்” ஆக மாறி வருவது தான் இந்த படத்தின் மையக்கரு. இளைஞர்கள் காதலை எப்படி அணுகுகிறார்கள், அதே வேகத்தில் அது எப்படி உடைந்து போகிறது என்பதைக் காலத்திற்கேற்ற உணர்வுகளுடன் பதிவு செய்ய முயற்சித்திருக்கிறது இந்த படம்.
பெரிய தொழிலதிபரின் மகளான ரோஸ்மின், வாழ்க்கையில் தன்னம்பிக்கை இருந்தாலும், காதலில் ஒரு மென்மையான மனசை கொண்டவர். வேலை இல்லாமல் போராடிக் கொண்டிருக்கும் ராணவுக்கு, அவள் தனது நிறுவனத்தில் வேலை வாய்ப்பு அளிக்கிறார். அந்த உதவி நட்பாக தொடங்கி, மெதுவாக காதலாக மலர்கிறது.
ஆனால் அந்த காதலுக்கு தடையாக நிற்பது ரோஸ்மினின் தந்தை. எதிர்ப்பை பொருட்படுத்தாமல் ராணவை திருமணம் செய்து கொள்ளும் ரோஸ்மின், அவரை தனது நிறுவனத்தின் உயர்ந்த பதவியிலும் அமர்த்தி, ஒரு வசதியான வாழ்க்கையை உருவாக்குகிறார்.
ஆனால் திருமணத்திற்குப் பிறகு, காதலில் இருந்த இனிமை குறைந்து, இடைவெளி, புரியாமை, சண்டைகள் அதிகரிக்க ஆரம்பிக்கிறது. காதலாக இருந்த உறவு, மெதுவாக ஒரு சுமையாக மாறுகிறது.
இவர்களின் உறவில் இந்த மாற்றத்திற்கு காரணம் என்ன? காதலித்த வேகத்தில் பிரிவை தேர்வு செய்யும் நிலைக்கு அவர்கள் ஏன் சென்றார்கள்? பிரிவுக்குப் பிறகு மீண்டும் ஒன்றாக இணைந்தார்களா? அல்லது வாழ்க்கை அவர்களை வேறு பாதையில் இழுத்துச் சென்றதா?
இந்த கேள்விகளுக்கான பதிலை உணர்ச்சிகளும் நிஜ வாழ்க்கை பிரதிபலிப்புகளும் கலந்து சொல்லும் ஒரு ரிலேஷன்ஷிப் டிராமா தான் இந்த படம்.
நாயகனாக நடித்திருக்கும் பிக் பாஸ் புகழ் ராணவ், இந்த படத்தில் முன் படத்தை விட கணிசமான முன்னேற்றத்தை காட்டுகிறார். குடும்ப பொறுப்புகள், பெற்றோரின் எதிர்பார்ப்பு, மனைவியுடன் உருவாகும் மனஅழுத்தம் போன்ற பல அடுக்குகள் கொண்ட கதாபாத்திரத்தை நிதானமாக கையாள்ந்து, ஒரு உண்மையான இளைஞனின் உளவியல் போராட்டத்தை வெளிப்படுத்துகிறார்.
நாயகியாக அறிமுகமாகும் ரோஸ்மின், முதல் படமே என்றாலும் தன்னம்பிக்கை மிக்க நடிப்பால் கவனம் ஈர்க்கிறார். பணக்கார பின்னணியில் வளர்ந்த பெண்களின் அணுகுமுறை, உறவில் உருவாகும் ஆணவம், உணர்ச்சிகளை வெளிப்படுத்தும் விதம் ஆகியவற்றை சமநிலையாக காட்டி, கதைக்கு வலுவான ஆதாரமாக திகழ்கிறார்.
கிரித்திக் மோகன் – அமிதா ரங்கநாத் ஜோடி, இளமையின் துள்ளலும், உறவின் மோதல்களும் கலந்த இயல்பான நடிப்பால் கதையை வேகமாக நகர்த்த உதவுகிறார்கள். இவர்களின் காட்சிகள், முக்கிய கதைக்கு இணையாக ஒரு மாற்று பார்வையையும் வழங்குகிறது.
சம்பத் ராஜ் (நாயகியின் தந்தை), கஸ்தூரி (மருத்துவர்), அர்ச்சனா (நாயகனின் தாய்) ஆகியோரின் அனுபவம் மிக்க நடிப்பு, படத்தின் உணர்ச்சி நிலையை உறுதியாக தாங்கி நிற்கிறது. ஒவ்வொரு காட்சியிலும் அவர்களின் நடிப்பு இயல்பாக பதிகிறது.
ஒளிப்பதிவாளர் எம்.வி. பன்னீர் செல்வத்தின் காட்சிகள் கலர்புல்லாகவும், அழகான ஃப்ரேம்களுடன் கண்ணுக்கு இனிமையாகவும் அமைந்திருக்கிறது.
இசையமைப்பாளர் ஜி.வி. பிரகாஷ் குமார் இந்த படத்தில் எதிர்பார்த்த அளவிற்கு பிரகாசிக்கவில்லை. பாடல்கள் நினைவில் நிற்காததுடன், பின்னணி இசையும் சில இடங்களில் தாக்கத்தை குறைக்கிறது.
படத்தொகுப்பாளர்கள் எஸ். பாஸ்கர் மற்றும் சுஜித், காட்சிகளின் உணர்ச்சியை சரியாக இணைத்து கதையை சீராக நகர்த்தியுள்ளனர்.
இன்றைய இளைஞர்களின் அவசரமான காதல், அதைவிட வேகமான பிரிவு போன்ற நிஜ வாழ்க்கை பிரச்சனைகளை இயக்குநர் ஏ.ஆர். காந்தி கிருஷ்ணா உணர்வுபூர்வமாக அணுகியிருக்கிறார். ஆனால், புதிய தலைமுறை காதலை ஆழமாக ஆராயாமல், பழைய குடும்ப பிரச்சனைகளின் கோணத்தில் கதையை எடுத்துச் சென்றிருப்பது சில இடங்களில் புதுமையை குறைக்கிறது.
அதே நேரத்தில், உறவுகள் குறித்து சிந்திக்க வைக்கும் காட்சிகளும், உரையாடல்களும் படத்திற்கு ஒரு முக்கியமான பலமாக அமைகிறது.
மொத்தத்தில், இன்றைய காதலர்களுக்கும் தம்பதிகளுக்கும் ஒரு எச்சரிக்கை மணி போல, உறவுகளை சீராக கையாள வேண்டியதன் அவசியத்தை நினைவூட்டும் ஒரு உணர்ச்சி நிறைந்த படம்.
ரேட்டிங் : 3/5 ⭐⭐⭐