‘அமரம்’ திரைப்பட விமர்சனம்

கிழக்குத் தொடர்ச்சி மலைப் பகுதியில் வாழும் மக்களின் வாழ்க்கை, வறுமை, வாழ்வாதாரப் போராட்டம் மற்றும் அவர்களைச் சுற்றி நடக்கும் சட்டவிரோத செயல்களை மையமாக வைத்து உருவாகியிருக்கும் படம் ‘அமரம்’.

விவசாயம் கைகொடுக்காததால் பொருளாதார ரீதியாக பின்தங்கியிருக்கும் ஒரு மலைக்கிராமம். அங்குள்ள மக்களின் வறுமையை தங்களுக்கு சாதகமாக பயன்படுத்திக் கொள்ளும் அதிகாரம் படைத்தவர்கள், அவர்களை குறைந்த கூலிக்கு செம்மரம் வெட்டுவது உள்ளிட்ட சட்டவிரோத வேலைகளில் ஈடுபடுத்துகிறார்கள். அந்த சூழலில் கூலிப்படையாக செயல்படும் கிராமத்து இளைஞன் அருகன், ஐரா அகர்வாலின் தந்தையை அவரது கண் முன்னே கொலை செய்கிறார்.

தந்தையின் மரணத்திற்கு காரணமானவரை எப்படியாவது கண்டுபிடித்து பழிவாங்க வேண்டும் என்று முடிவு செய்யும் ஐரா, கொலையாளி யார் என்பது குறித்து எந்தவிதமான உறுதியான ஆதாரமும் இல்லாத நிலையிலும் அவரை தேட ஆரம்பிக்கிறார். காதலரும், அவரது தந்தையான எம்.எல்.ஏ-வும் இந்த தேடலுக்கு உதவுகின்றனர்.

ஒரு கட்டத்தில் அருகன் இருக்கும் இடம் கண்டுபிடிக்கப்படுகிறது. பழிவாங்கும் கோபத்துடன் அவரை சந்திக்கும் ஐரா, அவரை கொலை செய்யும் அளவுக்கு சென்றும் எதிர்பாராத விதமாக தனது முடிவை மாற்றிக் கொள்கிறார். அதன்பிறகு நிலைமை முற்றிலும் மாறுகிறது. ஐராவையே குறிவைக்கும் எம்.எல்.ஏ மற்றும் அவரது மகனிடமிருந்து அவரை காப்பாற்ற வேண்டிய கட்டாயம் அருகனுக்கு ஏற்படுகிறது.

ஒருபுறம் காவல்துறை, மறுபுறம் அரசியல் செல்வாக்கு கொண்ட கும்பல் என நாலாபுறமும் ஆபத்து சூழ்ந்த நிலையில், அருகன் ஐராவை அழைத்துக் கொண்டு தப்பிச் செல்கிறார். அந்தப் பயணத்தில் இருவருக்கும் இடையே உருவாகும் மாற்றமும், அருகனின் கடந்த காலமும், அவரைச் சுற்றியுள்ள மக்களின் வாழ்க்கையும் படிப்படியாக வெளிப்படுகின்றன. இறுதியில் இந்தப் போராட்டத்தில் அருகன் ஐராவையும் தனது கிராம மக்களையும் காப்பாற்றினாரா என்பதுதான் படத்தின் மையக்கதை.

பொதுவாக தமிழ் சினிமாவில் மலைவாழ் மக்களின் வாழ்க்கையை சொல்லும்போது மேற்குத் தொடர்ச்சி மலைக்கு அதிக முக்கியத்துவம் கொடுக்கப்பட்டுள்ளது. அந்த வகையில், கிழக்குத் தொடர்ச்சி மலையை கதையின் முக்கிய பின்னணியாக தேர்வு செய்திருப்பது ‘அமரம்’ படத்தின் சுவாரஸ்யமான முயற்சி.

இயக்குநர் திருஅருள் கிருஷ்ணா, ஒரு பழிவாங்கும் கதையை மட்டும் சொல்லாமல், அதன் பின்னணியில் இருக்கும் சமூக மற்றும் பொருளாதார காரணிகளையும் இணைத்திருக்கிறார். வறுமையில் சிக்கிய மக்களை பணத்திற்காக தவறான பாதையில் அழைத்துச் செல்லும் அமைப்பை படத்தின் வழியாக பதிவு செய்திருப்பது குறிப்பிடத்தக்கது.

அருகன் கதாபாத்திரத்தில் நடித்திருக்கும் ராஜன் தேஜஸ்வர், படத்தின் மிகப்பெரிய பலங்களில் ஒருவராக இருக்கிறார். அதிக வசனங்கள் இல்லாமல், தனது பார்வை, உடல்மொழி மற்றும் ஆக்‌ஷன் மூலம் கதாபாத்திரத்தின் தன்மையை வெளிப்படுத்துகிறார். குறிப்பாக சண்டைக் காட்சிகளில் அவரது உடல் உழைப்பு தெளிவாக தெரிகிறது. முரட்டுத்தனமான தோற்றத்துடன் அமைதியான குணம் கொண்ட கதாபாத்திரத்தை நம்பகத்தன்மையுடன் கையாண்டிருக்கிறார்.

ஐரா அகர்வால், தந்தையை இழந்த மகளின் கோபத்தையும், பழிவாங்கும் எண்ணத்தையும் சிறப்பாக வெளிப்படுத்துகிறார். கொலையாளியை தேடும் காட்சிகளில் இருக்கும் வேகம் ஒருபுறம் என்றால், அவரை நேருக்கு நேர் சந்தித்த பிறகு ஏற்படும் குழப்பமும் மனமாற்றமும் மறுபுறம். இந்த இரு விதமான உணர்வுகளையும் சமநிலையுடன் வெளிப்படுத்தியிருக்கிறார்.

ஜார்ஜ் மரியான், பழங்குடியின சமூகத்தின் மூத்தவராக இயல்பான நடிப்பை வழங்கியிருக்கிறார். சாய் தீனா, நாகிநீடு, கல்கி ராஜன், ஹரிஷ் பெராடி, வாசுதேவன் முரளி உள்ளிட்ட நடிகர்களும் கதையின் மோதலை வலுப்படுத்தும் வகையில் தங்களது கதாபாத்திரங்களை கையாண்டுள்ளனர்.

பரத் குமாரின் ஒளிப்பதிவு படத்திற்கு மிக முக்கியமான பலம். கிழக்குத் தொடர்ச்சி மலையின் வறண்ட நிலப்பரப்பு, கிராமத்தின் சூழல், அங்குள்ள மக்களின் வாழ்க்கை முறை என அனைத்தையும் இயல்பாக பதிவு செய்திருக்கிறார். குறிப்பாக ஆக்‌ஷன் காட்சிகளில் கேமரா பயன்படுத்தப்பட்ட விதம் படத்தின் வேகத்தை அதிகரிக்கிறது.

மிக்கி ஜெ. மேயரின் இசை கதையின் சூழலுடன் இணைந்து பயணிக்கிறது. பாடல்கள் கதைக்கு இடையூறு ஏற்படுத்தாமல் அமைந்துள்ளன. பின்னணி இசை துரத்தல் மற்றும் சண்டைக் காட்சிகளுக்கு தேவையான பரபரப்பை கூட்டுகிறது.

எடிட்டர் ஆர். ஸ்ரீராமர், கதையின் வேகத்தை சீராக வைத்திருக்கிறார். ஆரம்பத்திலேயே கதாபாத்திரங்களையும் பிரச்சனையையும் தெளிவாக அறிமுகப்படுத்துவதால் படம் நீண்ட நேரம் சுற்றி வராமல் நேரடியாக கதைக்குள் செல்கிறது. முதல் பாதியில் செம்மரம் வெட்டும் கும்பல் மற்றும் அதன் பின்னணியை விறுவிறுப்பாக சொல்லும் படம், இரண்டாம் பாதியில் நாயகன்–நாயகியின் தப்பிக்கும் பயணத்தை மையமாக்குகிறது.

திரைக்கதையில் சில இடங்களில் கமர்ஷியல் சினிமாவுக்கான வழக்கமான அம்சங்கள் தென்பட்டாலும், அவற்றை சமூகப் பின்னணியுடன் இணைத்திருப்பது படத்திற்கு தனித்தன்மையை ஏற்படுத்துகிறது. குறிப்பாக வறுமையால் தவறான தொழிலுக்குள் தள்ளப்படும் மக்களின் நிலை குறித்து படம் பேசும் விதம் கவனிக்க வைக்கிறது.

இயக்குநர் திருஅருள் கிருஷ்ணா, காதல், பழிவாங்கல், ஆக்‌ஷன், துரத்தல் என ஒரு கமர்ஷியல் படத்திற்குத் தேவையான அம்சங்களை பயன்படுத்தியபோதும், கிழக்குத் தொடர்ச்சி மலை மக்களின் வாழ்வியலை கதையின் மையத்தில் இருந்து விலக்காமல் பார்த்துக் கொண்டிருக்கிறார்.

மொத்தத்தில், புதிதான களத்தையும் சமூகப் பின்னணியையும் ஆக்‌ஷன் கதையுடன் இணைத்து சொல்லியிருக்கும் ‘அமரம்’, வழக்கமான பழிவாங்கும் கதையாக இல்லாமல், கிழக்குத் தொடர்ச்சி மலையின் மறைக்கப்பட்ட வாழ்க்கையை பார்வையாளர்களுக்கு அறிமுகப்படுத்தும் முயற்சியாக அமைந்திருக்கிறது.

ரேட்டிங்: 3.5/5