பருத்தி’ படம் எப்படி இருக்கு?

‘பருத்தி’ திரைப்பட விமர்சனம்

நடிப்பு: சோனியா அகர்வால், குட்டி புலி சரவண சக்தி, திலீப்ஸ், வர்ஷிட்டா, சுகன்யா
இயக்கம்: குரு.அ
இசை: ரஞ்சித் வாசுதேவன்
தயாரிப்பு: கோடண்டா & கோ, லட்சு கணேஷ் 🎬

கணவரை இழந்த பிறகு, ஊருக்குத் தள்ளி தனது உறவினர் வீட்டில் தங்கி வாழ்கிறார் சோனியா அகர்வால். விவசாய கூலி வேலைதான் அவரது வாழ்க்கை; “என் சொந்தம்” என்று சொல்லிக் கொள்ள யாருமில்லாத தனிமை அவரைச் சூழ்ந்திருக்கிறது. மறுபுறம், பெற்றோரின் முகமே அறியாத சிறுவன் திலிப்ஸ், பாட்டியின் அன்பில் வளர்கிறான். பள்ளியில் அவனுக்குக் கிடைக்கும் ஒரே மகிழ்ச்சி—அன்பும் கவனமும் காட்டும் வகுப்பு தோழி வர்ஷிட்டாவின் நட்பு.

இளம் வயதிலேயே சாதி ஏற்றத்தாழ்வின் கசப்பை அனுபவிக்கும் திலிப்ஸ், மனதளவில் சிதறத் தொடங்கும் தருணத்தில், அதிர்ச்சியான உண்மை ஒன்று வெளிப்படுகிறது—அவனின் அம்மா சோனியா அகர்வால்தான். மகனை பிரிந்து வாழ வேண்டிய கட்டாயம் ஏன்? சாதியால் நசுங்கும் அந்தக் குழந்தை அதிலிருந்து விடுபட்டதா? இந்த கேள்விகளுக்கான உணர்ச்சிப்பூர்வமான பதில்களே ‘பருத்தி’யின் மையம்.

விவசாய கூலித் தொழிலாளியாக கிராமத்து பெண்ணாக மாறி நிற்கும் சோனியா அகர்வால், தோற்றத்தில் புதுமையைத் தரினாலும், அவரது கதாபாத்திரமும் நடிப்பும் தனித்து மின்னும் அளவுக்கு திரைக்கதை இடம் கொடுக்காதது பெரிய குறையாக தெரிகிறது.

கதையின் மையமாக வரும் சிறுவன் திலிப்ஸ், தன்னிடம் இருக்கும் திறமையையெல்லாம் கொட்டி நடிப்புக் கடலில் முழுக முயன்றிருக்கிறார். அந்த முயற்சி சில காட்சிகளில் பலனளித்து மனதில் பதிகிறது.

வர்ஷிட்டா, சுகன்யா, குட்டிப்புலி சரவண சக்தி உள்ளிட்ட மற்ற நடிகர்கள் அனைவரும் தங்களுக்கு வழங்கப்பட்ட வேலையை நேர்மையாகச் செய்திருக்கிறார்கள்.
ரஞ்சித் வாசுதேவனின் இசை—பாடல்களிலும் பின்னணி இசையிலும்—படத்திற்கு ஒரு அடையாளமாக இருந்து கவனம் ஈர்க்கிறது.

ராஜேஷின் ஒளிப்பதிவு கிராமத்து சூழலையும் மனிதர்களின் இயல்பையும் அழகாகப் பதிவு செய்கிறது. ஆனால், படத்தொகுப்பாளர் ஆர்.கே. செல்வம், திரைக்கதை சொல்ல நினைத்த கருத்துகளை இன்னும் தெளிவாக கொண்டு செல்ல வாய்ப்பை தவறவிட்டுள்ளார்.

எழுதி இயக்கிய ஏ. குரு, தாய்–மகன் உறவையும் சாதி பாகுபாட்டுக்கு எதிரான தனது கோபத்தையும் சொல்ல முயன்றாலும், அந்த எண்ணங்கள் திரையிலே முழுமையாக வடிவம் பெறவில்லை. முயற்சியும் சிந்தனையும் பாராட்டத்தக்கவை; ஆனால், சொல்லும் விதமே தடுமாறுகிறது.

மொத்தத்தில், சமூகக் கருத்து பேச நினைத்தாலும், உணர்ச்சி அளவில் பாதிக்கத் தவறிய படம் ‘பருத்தி’.
ரேட்டிங்: 2/5 ⭐